Cap. I.

Volumus atque monemus omnem generalitatem sacerdotum istius diocesis, ut de fide sanctæ trinitatis intellegenda et predicanda vigilantius laborare procurent, quam actenus repertum habeamus, secundum data sibi a nobis capitula de eadem sancta trinitate.

II.

Ut circa animarum vobis commissarum salutem magnopere laborare satagatis tam in pænitentiis dando quamque et in reconciliatione iuxta modum canonicæ institutionis, quem vobis verbis et scriptis contradidi.

III.

Noverit unusquisque sacerdos generali episcoporum prolatione diffinitum esse, ut, quicumque sacerdotum inordinate ac sine idoneis testibus vixerit et in quorum domibus femine indiscrete habuerint, post proprii episcopi interdictum ab ordine deponendum.

IV.

Ut vestra ammonitione et adnunciatione sciat populus, qualiter se purificare debeat ad percipienda mysteria corporis et sanguinis domini, et ut saltim tertia dominica sacrosancta muniatur communione.

V.

Ut generalitas omnis sacerdotum in amplectendis virtutibus et cavendis viciis, sicut distincte et ordinate a nobis ea data esse constat, magnopere laborare non cesset.

VI.

Ut nullus sacerdotum venationem canum vel quælibet huiusmodi exercere præsumat.

VII.

Monemus sollertiam vestram, ut de omni ministerio sacerdotali et de omni honestate et utilitate ad sacerdotalem pertinentem reverentiam abhinc non tam desidiose agatis, sicut quidam ex vobis, ut manifestissime patet, hucusque egerunt, sed, si amplius qualibet inrationabili excusatione non potestis, saltim officiis, super quibus interrogare solemus, et capitulis de trinitate et canonibus et pænitentiæ et de aliis utilitatibus operam dare non neglegatis, quatenus ea intellegere et opere implere studeatis.

VIII.

Ut si quis sacerdotum per sevam cupiditatem et avaritiæ rapinam decimas ad alium sacerdotem rite pertinentes post nostram inhibitionem et communem castigationem invadere præsumpserit, noverit se, tamquam interdicta violare non erubescit, periculum proprii gradus subiturum.